BREMA

I.

BREMA

dicta a voce Pramen, i. e. navibus latissimis, quibus olim in transnavigando usi, antequam ponte Visurgis iungeretur: Civitas est Imperialis murô circumdata, circa A. C. 1309. et inter insigniores Germaniae urbes locum tenet: in inferiore Saxonia cum Archiepiscopatu, cuius sedes olim ab Hamburgensibus huc transsata est, ubi ante Archiepiscopatus erat omnium Aquilonarium provinciarum; et Ducali Frisiae orientali vicina, Hansdagica, mercimoniis florens est, ad Visurgim fluv. posita, ex quo admirandae altitudinis rota aquam ad incolarum necessitates in hanc urbem per canales subterraneos artificiose transfundit. Ligneum habet pontem, sub quo molae frumento frangendo, et tormentario pulveri tundendo destinatae complures ordine haetent. Gubernatio ab antiquo penes Potestates et Iudiciariam manum: postmodum Proconsules et Consules, stetit, donec in Oligarchiam, tempore Groepelingii, interfecti A. C. 1307. vergeret: quibus eiectis magis Democratice regi coepit, donec A. C. 1391. sub Bonifacio Papa dispositione huius accedente, optimi quique de civitate in Senatum cooptarentur: quae electionis ratio hodieque in usu. Caput est regiunculae adiacentis, in varias Gohen divisae. Libera semper fuit, neque in illa Archiepiscopus ius terrendi aut merum mixtumque imperium, aliaque iuri territoriali adhaerentia, habuit unquam. Ioh. Wachmannus Descr. Reip. Brem. Zelieri Itiner. Germ. Saurii Theatr. urb. Ob fidelitatem iam olim insignibus privilegiis donata est, a Carolo M. Friderico I. Henrico V. Wilhelmo, Carolo V. Matthia, Ferdinando III. Imperatorib. De controversia cum Archiepiscopo A. C. 1639. ut et de statu immedietatis eius, motâ A. C. 1641. ab Archiepiscopo et A. C. 1653. a Suecicis Legatis iisque quae hinc suborta, vide Burgoldensem p. 3. ad Instr. Pac. Disc. 13. n. 3. et ibi not. Franc. Irenici, in Colleg. ad Burgold. Insignium ei locô Claves sunt, eo quod, ob viciniam maris, non modo Imperio mercibus suis multum utilitatis affert, sed et mare praesertim ad Wiserae ostium, et in Wisera a praedonibus liberum, tutumque praestat. Pluta vide apud Limnaeum de Civ. Imp. Reformatam religionem sequitur, primô Euangelii praecone usa Henricô Zutphaniensi: Lutheranis exercitiô liberô quoque concessô. Bremerfordia, sedes postea Archiepiscopi, cuius ditio nunc sub Suecis, ab A. C. 1649. Adam de Bremen l. c. 17. Crantz. histor. Sax. l. 1. et 2. Cluver. l. 3. longitud. 30. 17. latitud. 53. 25. Vide Bremensis Ducatus et Phabir anum.

II.

BREMA

urbs Asiae, in India extra Gangem, ad fluv. Menanum. Caput regni cognominis in regione Pegu.